mujhko maara hai har ek dard-o-davaa se pahle 
dii sazaa ishq ne har jurm-o-Khataa se pahle 

aatish-e-ishq bha.Dakatii hai havaa se pahle 
honth jalate hain muhabbat me dua se pahle 

ab kamii kyaa hai tere be-sar-o-saamano ko 
kuchh na thaa terii qasam, tark-o-fanaa se pahle 

ishq-e-bebaak ko daave the bahut Khalavat mein 
kho diya saara bharam sharm-o-hayaa se pahle 

maut ke naam se Darte the ham, ai shauq-e-hayaat 
tune to maar hii Daala thaa qazaa se pahle 

ham unhein paake "Firaq" aur bhi kuchh khoye gaye 
ye takalluf to na the ahad-e-vafaa se pahle.....
Do you Like this story..?

Get Free Email Updates Daily!

Follow us!