Dil ki meri beqarari mujh se kuch pucho nahin
shab ki meri ah-o-zari mujh se kuch pucho nahin

Bar-e-gam se mujh pe roz-e-hijr mein ik ik ghari
kya kahun hai kaisi bhari mujh se kuch pucho nahin

Meri surat hi se bas malum kar lo ham-damo
tum haqiqat meri sari mujh se kuch pucho nahin

Sham se ta-subah jo bistar pe tum bin rat ko
main ne ki akhtar-shumari mujh se kuch pucho nahin

Ai "Zafar" jo hal hai mera karunga gar bayan
hogi un ki sharm-sari mujh se kuch pucho nahin

Do you Like this story..?

Get Free Email Updates Daily!

Follow us!