maut ek geet raat gaati thi 
zindagi jhuum-jhuum jaati thi

kabhi diivaane ro bhi padte the 
kabhi terii bhii yaad aati thi 

kis ke maatam mein chaand taaron se 
raat bazm-e-azaa sajati thi 

rote jaate the tere hijr nasib 
raat furqat kii Dhalati jaati thi 

kho_ii kho_ii sii rahati thi vo aankh 
dil kaa har bhed paa bhi jaati thi 

zikr tha rang-o-buu kaa au' dil mein 
teri tasvir utarati jaati thi 

husn me.n thii in aansuon ki chamak 
zindagi jin mein muskurati thi 

dard-e-hasti chamak uThaa jis mein 
vo ham ahal-e-vafaa ki chhaati thi 

tere un aansuon ki yaad aayi 
zindagii jin mein muskuraati thi 

thaa sukuut-e-fazaa tarannum-rez 
buu-e-gesuu-e-yaar gaati thi 

Gam-e-jaanaa.N ho yaa.N Gam-e-dauraan 
lau si kuchh dil mein jhil-milaati thi 

zindagi ko vafaa ki raahon mein 
maut Khud raushani dikhaati thi 

baat kyaa thi ki dekhate hi tujhe 
ulfat-e-ziist bhul jaati thi 

the na afalaak gosh bar aavaaz 
beKhudi daastaan sunaati thi 

karavatein le ufaq pe jaise subah 
ko_ii doshizaa ras-masaati thi 

zindagi zindagi ko vaqt-e-safar 
kaaravaan-kaaravaan chhupaati thi 

saamane tere jaise koi baat 
yaad aa-aa ke bhuul jaati thi 

vo teraa Gam ho yaa Gam-e-duniyaa 
shamma-sii dil mein jhil-milaati thi 

Gam ki vo daastaan-e-niim-shabi 
aasmaanon ko nind aatii thi 

maut bhi gosh bhar sadaa thi "Firaq" 
zindagi koi giit gaati thi...
Do you Like this story..?

Get Free Email Updates Daily!

Follow us!